Onkwawén:na Kentyóhkwa

Sha’té:kon niwáhsen wisk nihá:ti ronatohétston tsi wahontéweyenhste Kanyen’kéha Onkwawén:na Kentyóhkwa nón:we. Tyóhton yawén:re tewen’nyá:wer tyóhton niwáhsen tyóhton shiyohserò:ten wahahténtya’te ne Onkwawén:na Kentyóhkwa yontaweya’táhkwa ne Owennatékha. Shontahontáhsawen, o’karahsnéha ok wahontéweyenhste Kanyen’kéha Polytech nón:we. Tehahén:te táhnon Kantawákhon ronwatí:yats ne shakotirihonnyén:ni ne eh shikahá:wi.

E’thó:ne tsi yetsyenhayentáhkwa nón:we wahanonhsaníha ne aóskon Kanyen’kéha ahontéweyenhste ne tsyóhsera nikarì:wes. Tyótkon wà:rehre ahatá:ti tsi nitewawennò:ten ne Owennatékha. Shihanekénhteron wahate’nikonhrísa tsi ì:rehre ahà:ronke. Kaná:takon rotehyà:ron, Wahstonhronòn:ke táhnon Koráhne. Yah teyotkà:te ne onkwawén:na ahothón:te’ne kaná:takon. Tewáhsen niyohserá:ke tsi náhe kanenna’kè:ne nikahá:wi, Ohswé:ken tontahaná:tahkwe. E’thó:ne wisk yawén:re niyohserá:ke tsi náhe, Onkwawén:na Kentyóhkwa wahahténtya’te ahatéweyenhste. Wahóhnha’ne ne Kanatawákhon ahshakorihónnyen. Ne ò:ni ne Tehahén:te, Tekáhstya’kskénha,

Kahnekatsyéntha’kénha, Ruth Isaacskénha táhnon Ray Millerkénha akwé:kon wahshakotiyé:nawa’se ahontéweyenhste. Shontayohserò:kten, Owennatékha yah tehawé:ron ahshakorihónnyen. Wà:rehre a’é:ren nyá:re ó:ya’k nahò:ten ahoyó’ten nó:nen wahonteweyenhstá:ko. Nek tsi niya’tehá:ti wahshakó:ken ka’ok nón:we Onkwehonwè:ne táhnon wahonwarihwanón:tonhse: “Kátke enwaterihwahtén:ti ne tékeni watòn:tha yohserá:te? Í:kehre ní:’i ò:ni akà:ronke.” Eh ne aorì:wa tsi wahate’nikonhrísa aontahatáhsawen ahshakorihónnyen ne Ohswekenhá:ka.

Sha’té:kon niwáhsen wisk nihá:ti ó:nen wahshakoyé:nawa’se ahòn:ronke ne Ohswekenhá:ka tsi nitewawennò:ten. Shé:kon é:so nihá:ti ne onkyonkwè:ta rotirhá:re ahonate’shennayén:ta’ne ahòn:ronke ò:ni. Karonwarà:ke rorihwahseronnihátye ne Kanyen’kéha yonteweyenhstáhkwa. Ne káti enwá:ton ón:kwe ahontéweyenhste nè:ne í:non thatinákere, tóka’ni tóka’ yah tehotináktote ahontéweyenhste Ohswé:ken nón:we tsi niwenhniserè:sons.

Onkwawén:na Kentyóhkwa ya’kkwátho shisewén:te. Kahsennaká:yon yontátyats ne tsyakothonwí:sen wa’kheyentérha’ne nene Singapore nityakawé:non táhnon onkwawén:na yakoteweyenhstonhátye. Yóntstha ne karonwarà:ke yonteweyenhstáhkwa ayontéweyenhste táhnon Ohswé:ken tayonkhikwáhtho onkwanakeráhsera. Tewén:take ok nikarì:wes enwá:ton ken’ ayèn:seke nek tsi é:so tsi yonhkwísrons táhnon é:so yekwényes ó:nen aya’í:ron ne Onkwehonwehnéha. Ó:nen yonhrónkha ne German, Thatikahro’thiye’kéha, Mandarin táhnon O’seronni’kéha. Wa’onterò:roke niya’té:kon teyóya’ks nene karonwarà:ke wahara’nén:takte ne Owennatékha. Ne ò:ni, wa’ontkahri’tsherón:ni ne “Assassins Creed 3″ karonwarà:ke. Né:’e tayako’nikonhratihéntho Kanyen’kéha ayontéweyenhste.

Yá:ken tsi aonhá:’a tyewennanòn:we’s ne Kanyen’kéha. Wa’í:ron tsi yon’wé:sen tsi ní:yoht tsi tetewawennakhányons táhnon tsi ní:yoht tsi onkwawenna’shón:’a tekonterihwahthè:tha tsi niwatyérha táhnon tsi niwatkahtho’tsherò:ten niya’té:kon nahò:ten.

Yakonehrakó:’on tsi nikanakerahserí:yo ne Ohswé:ken. Wa’í:ron tsi niyoyánere tsi ní:yoht tsi tetewatátshnye’s ne onkyonkwè:ta kén:tho. Ayá:wenhs tsi entyontkón:tahkwe tsi yakoteweyenhstonhátye táhnon enwá:ton á:re aonsayonkhikwáhtho ne Ohswekenhá:ka.

Thok nikawén:nake niyáhkwe.

Related Posts

Comments are closed.